الوطن هذه القضية الكبرى ستبقى قضية تصرخ
فهذه صرختي
((صرخة وطن ))
أمس مر الوطن طيف أعله بالي يلوح
خريطة أتجسدت وبصورة أنسان
عاتبني الوطن مثل أم ولد مفكود
حلك واحد شفت بس بيه مية ألسان
كتله أرد أنشدك بالمصاب منيلك هاذ !
هم من الغدر تتوالد الغربان ؟
هم شفت السيوف تلوج وألهه اسنون ؟
لو موسم حصاد بمنجل العميان !
لو رد الشمر يذبح نحر مظلوم
ونسوانك غنيمة لثار ابن سفيان
هم ردت هند بالوحشي تطلب ثار ؟
والحمزه تغدرة بحومة الميدان
هم رد المرادي بسيف غدره يحوم ؟
نفس المسألة بس غيروا عنوان
جاوبني الوطن ودموعه تجري دموم
لا .. موش بحلم صدكيني مو حلمان
يعراق المصايب جلجلت كارات
أرهاب ويهود ومحتل أمريكان
دك بابي الحزن حسبالي أجد خطار
سكن كل دور أهلنه ولبسانه احزان
فضت والفيض نهر ادموع
ودمعات المصايب ترسّت نهران
من حزن المصايب ربح كل بزاز
طول اقماش الأبيض صارت ألنه اجفان
أنه بصبري أحيرن وابقه ألولي اعليه
اخافن ينتفض بيه ويطك بركان
يمته نثور نصرخ لو سكتنه نموت
غركت هالسفينه البيهه ألف سفان
هلي ... مو من شيمهم نامو بليل
هلي العشرين همه البيه الف عنوان
هلي فرشو رداهم حدر الضيوف
هلي ماعون مملي يشبع الجوعان
على صوت التفك ركصوا هلي اسنين
ويطرب لو سمع دكات ثارت دان
يمته الغيره تصرخ رادتلهه أرجال
تشد أحزام حيلي ابشَدة الخوان
هايبني أريدك تركض أعله الموت
واشوف وسام جرحك بالصدر نيشان
إذا بساعة الشده الوطن يتنخاك
وإذا ماتنطي روحك مو عراقي الآن
وإذا ماتنطي روحك مو عـــــــــراقي الآن