أمس طبنه الحزن طبة مجانين
ولا حاجوز لاكه الحزن ويرده
علينه شكد تمرد طب علينه الدار
ما راعه للدار الحرمه وأتحده
مد الحزن سيفه بقتل وبتهجير
وبالتفجير سيفه أركابنه أتحده
صارت بالعكس باب اليجيب الريح
لازم ينفتح اكبر غلط سده
ربك مو يرصّي واقرا الآيات
على كلمن قريب الواجب أتوده
غــــابه اصـــــبحت حـــكم ذيـــب وشــاة
القوي مرتاح لاحك بالرجيج وياكل بكده
الأحزاب بالدستور طبقت قاعده شتكول
من المصباح أخوك أكله كبل لابيك يتغده
غلط كلمن تواضع يخدم الناس
عجيب يصير منصب عنده ويهده
دمارك ياعراق الصار بيك احزاب
وحرامية الأحزاب أتكصص بجبده
أذن حكهه عليك تبوشت بغداد
وحكهه شما تطول أعليك بالعده
حراميتك تميزيت ما تبوك أموال
تبوك الدار كلهه تعوفك بشده
تتعب والتعب ماضاع عل الطيبين
والطيبين ماتكدر تلم الماي اليّ تبده
صح عدهم ضمير الماسكت فد يوم
وبصوت الضمير أنذال ظلت لايذه بسده
نعم مكدور نوكف وكفة العشرين
بس خوف الرذيلة أتخون بالشده
كبلك ياعراق أحسين مو خذلوه
نفس القصه صارت فرق بالمده
دزوله الرسايل اقبل ونادوه
اقبل والنتيجة تحاشمو ضده